“شروق” عالجت آلام مرضها بإبداعات فان جوخ واستوحت أعمالها الفنية من لوحاته

تأثرت شروق الشمس جمال، بألوان لوحات الرسام الهولندي، فان جوخ، كثيراً حتى إنها كانت تنجذب لاختياره للألوان وقدرته على التعبير في لوحاته، حتى إنها صممت فستانها بلوحة من لوحاته الشهيرة وطبعتها على جدران البازار الذى افتتحته وكذلك طرحت لوحاته الفنية وأعمالها اليدوية.

قالت شروق الشمس جمال، مهندسة ديكور، عن تأثرها بفن فان جوخ، حيث قالت لـ” اليوم السابع”:”أخترت لوحات فان جوخ، لأني بحب ألوان لوحاته الفنية، وكمان عشان مريت بأزمات نفسيه صعبة، وده اللي خلاني حولت تعبى و ألمى اللى بمر بيه من ٣ سنين، نتيجة إصابتى بنزيف و إرتجاع مرئ وورم في الغدة الدرقية، لبهجة وكل قطعة صممتها وكذلك وحدات الإضاءة حتى الأزياء اللى صممتها مستوحاة من فان جوخ”.

أضافت :” حبيت أجمع في أعمالى الفنية بين دراستي و هوايتي و الحاجات اللي بحبها في حاجة واحدة  واخترت فان جوج لأنه ينفع لكل ده سواء للوحاته وقصته، وكمان الناس لما بتشوف الشغل بتنبهر، و بتحب تتصور بجوار التصميمات”.

واجهت شروق العديد من الصعوبات في عملها، حيث قالت :”  ناس كتير أكبر مني سناً بتستغرب إني وصلت لحاجات كتير قبلهم أو قبل ما أوصل لسنهم وده بيأثر عليا بالسلب لكن اللى بيساعدنى على تخطى كل ده وبيشجعنى على الشغل هو عبد الرحمن، خطيبى، اللى بيقدر يخليني أتحمل ووقف جنبي فى فترة مرضي ، برغم الصعوبات اللي مرينا بيها مع بعض”.

وعن أمنية شروق في المستقبل، قالت :”اللي نفسي اعمله في المستقبل، بحب يكون سري بيني و بين ربنا عشان أقدر أحققه صح، لكن أنا بحب أتحدى وأوصل للى أنا عايزاها”.