قيمس الملكوت …. “رواية للكاتبة فاطمه سالم الورفلي “

قيمس الملكوت رواية للكاتبة الليبية فاطمه سالم الورفلي

محدش ياخد فكره روايه اول مره تنطرح
#قيمس_الملكوت
اعلان
بقلم :فاطمه سالم الورفلي
……………………………….
…..
-اني قتلك وافقي على كل شروط او اطلعي و وافقتي يبقى مشكلتك مش مشكلتي

-بس انت كيف تطلب مني نقتل!

-توا انتي بديري لي قتلك عليه ولا لا

قيمس الملكوت

…………
الحلقه :الاولى
بقلم :فاطمه سالم الورفلي
……………………………………
…..
“في ريسبشن العياده ”

اني :سميره ركزي ره كل شوي المشرف يخطم.. وانتي كل شوي شاده هالتليفون

سميره :باهي غر شوي نعبي بياناتي

اني :بيانات شني؟

سميره :بيانات اللعبه غر اسكتي

اني :فهميني لعبه شني

سميره :غر شوفي الحالة هادي اهي لي جت وتو نحكيلك

اني :اووف منك اووف

-ونرفع عيوني.. ويجو لي يحبه قلبي.. حنطيه بشرته.. وعريض وطويل.. وفيه حاجه ياناس فيه حاجه شدتني ليه.. ما نعرفش ملامحه البشوشه ولا شنو.. جداب جدااب لدرجه العذاب اووف 🤤❤

:السلام عليكم موجود دكتور اسنان

اني :اا احم ايي اي موجود

:همم كيف الحال باهي

اني :ها اا بخير بخير.. عفوا اسم الكريم

:ملكوت

اني استغربت :نعم

ملكوت يحك في لحيته :م.. ل.. ك.. و.. ت.. بحذف الواو والتاء…. وبزياده اللام والكاف

اني اسكتيت :هاا!

ملكوت ضحك وخدي مني المذكره والقلم وكتب اسمه :واضح هكي!

اني سارحه فيه ومرتبكه :هاا ايي.. “فطنت لروحي”.. اا هه ا عاشت الاسامي

ملكوت :تعيشي

اني :اا احم تقدر ترتاح في حجرة الانتظار لعند ما يجي دورك رقم 7

ملكوت :ايي ماقتيليش شن اسمك!

اني :هاا!

ملكوت بضحكه :اسمك اسمك خيرك خاشه في بعضك؟

اني :اا اس.. اسميي!..

-ملكوت يحك في لحيته وهز براسه مبتسم

اني بلعت بريقي :اا العصماء .. اسمي العصماء

ملكوت :همم العصماء.. معناه بياض الغزال مش صح

-اني هزيت براسي

ملكوت :حلو يا العندليبه الاسمرانيه

اني استغربت :العندليبه!

ملكوت ضحك:اه منك يا الاسمراني “ومشي لحجره الانتظار.. بينما اني سرحانه في كلامه المبهم.. حاسه انه مبهم ولا اني نتخيل! ”

سميره :وطلع اسمك العندليبه 😂

اني ابتسمت :محلااه يا سميره محلاه في حاجه حلوه

سميره :عاجباتك صلوعته امالا😂

اني :مبرددك والله يهبل

سميره :هاتي ترا هاتي تليفونك نبعتلك اللعبة يا العندليبه

اني عطيتلها تليفوني:شكله يحب عبد الحليم حافظ

سميره تنهدت:اخخ خرفيي

-وقعدو الحالات يخشن ويطلعن واني كل شوي يخطف عقلي هالملكوت.. شوش عقلي.. وكل شوي نقول لا لازم ننتبه لشغلي.. بس الغريب في الامر انه الرقم وصل لي 15 وهو لعند توا ما طلعش من الحجرة.. احسن شي خلي اني نمشي للحجرة ….طلعت المرايا من شنطتي و واسيت وشاحي.. ومكياجي.. وطلعت من الطاوله الاستعلامات.. وتوجهت لحجرة الانتظار.. فاحت عليا ريحه غريبه غيرتلي مزاجي 180 درجه.. ريحت بالي.. وجت نسمه ريح هاديه .. على وجهي.. وتلوحت ورقه اشبه بأوراق القديمه.. طبست خديتها.. على طول شفت كلمه مكتوب فيها “اه منك يا الاسمر يا اسمراني مين باعتك عليا ” . . ابتسمت.. بس مالقيتش حد في الحجرة..

سميرة :هيا الباص جي ره هي نروحو

اني :به هاتي تليفوني وشنطتي مديهلي

سميره مدتهملي :هاك هيا اطلعيله راهو يعدي

اني :هي اهو طلعت

-وبالفعل طلعت وفتحت الباص.. وركبت.. بس النسمه جتني مره تانيه.. والباص فاتح اغنيه “يا الاسمر يا اسمراني “.. لا اراديا ابتسمت.. بس هالمرة غير..

ملكوت :اهلا اهلا

-سمعت صوت ملكوت وراي.. معقوله نتخيل اني

ملكوت :عصماء!

-التفتت جيهة الصوت لقيته ملكوت

اني نصدمت:اا اهلين!؟

ملكوت :امم كيف حالك توا؟

اني :بخير..

-و التفتت عنه القدام.. وقعدت مصدومه.. هدا خيره في كل مكان نلقى فيه؟.. قعدت طول الطريق نسمع في الاغنيه ومصدومه.. لعند وصلت.. وفات ليوم كله نوم طول رقدت من التعب.. لين في الليل نضت .. درت حاجه لروحي ناكلها.. ولقيت جداي راقده.. وجيت قعمزت.. جت عيني على صوره امي وبوي الله يرحمهم.. اخخ ربي يغفرلهم يارب …. مسحت دمعتي على طرف عيني بصبعي.. وتفكرت اللعبه.. قلت خلي نلعبها.. خديت تليفوني من الشنطه وفتحته.. لقيت اللعبة اسمها “قيمس الملكوت “.. شن قصه الملكوت لي ملاحقني هدا!.. بس شكلها مجموعه العاب.. تنهدت.. وفتحت على اللعبة.. طلعي مكتوب

-هل انتِ متأكدة من ذلك

-ضغطت على نعم.. طلعتلي قائمه..

-اذا انتِ متأكده اخدشي اصبعتك والتقطي صوره لها

-ضحكت وخشيت للقوقل بناخد صوره يد مجروحه.. طلعتي قائمه من اللعبة مكتوب فيها.. ” هل انتِ روبوت!.. لا تخدعيني “.. تجاهلت قائمه.. وجيت بنزل صوره.. اصكر التليفون .. قفلته وفتحته.. طلعت لي القائمة مره تانيه مكتوب فيها…. ” لا تخدعيني ..انني احذرك “.. مطيت فمي بلا مبالاة.. وجرحت صبعي بدبوس.. وصورتها.. ودرت على زر ملف مرفق.. واخترن الصورة وبعتتها .. شوي جتني قائمه مكتوب فيها ………

-” احسنتي عزيزتي.. والأن املئي معلوماتك.. ولا تخدعيني انني احذرك.. احذرك اتفهمين”

-ضغطت على نعم.. وقعدت نكتب في اسمي ومستهينه بالموضوع.. قلت هي خلي نشوفو اخرتها.. بس لعند وصلت في اخر فقره لي هي مطلوب مني نصور جواز السفر متاعي استغربت!.. بس درت تخطي.. طول طلعتلي قائمه

-اذا انتِ جاهزه ومستعده للعب لا تخدعيني.. واكملي المعلومات.. ولا تتخطي خطوه الا وانتِ اكملتيها

-تأففت.. وخديت جواز السفر.. وصورته وبعته..طلعلي شريط مكتوب فيه يتم التحميل.. ويمشي بشوي.. حطيته على الفراش.. ونضت توضيت صليت المغرب والعشي.. ورجعت رقدت..

-تاني يوم :
•نضت على صوت جداي تنوض فيا

جداي :نوضي ابنيتي نوضي افطري هيا

اني نحك في عيوني :هيا هيا يام نضت هي

جداي :بسم الله خيره صبعك مجروح

اني ضغطت عليه و ابتسمت :اها امس خشت فيا شوكه من الشجره شكلها

جداي :اييااه باهي به نوضي عصماء عصومه هي درتلك شكشوكه وامس حصلت بسيسه من عمتك فوزيه.. ليا اسبوع نراجي فيها هدا وين خدمتها هي نوضي

اني :هيا نضت نضت.. ااخ واخيرا بنفطر بسيسه

جداي :انتي زي جدك وامك الله يرحمهم مايفوتش اسبوع والا البسيسه كامله تقول تهرسو فيا مش تاكلو فيها

اني نتكاسل :البسيسه هي اساس الحياة اخخ ياربي صباحوو يا احلى وحده في الدنيا

جداي :صح النوم نوضي انشطي هي

-نضت من مكاني زحزحت على قولة جداي .. وخشيت الحمام حشاكم.. وطلعت صليت الفجر والصبح.. ومشيت قعمز بحدا جداي نفطر

جداي :بعد ما تفطري وكلي السعي واني خلي نرمي الحميات في الفرن وندير الغدي شرموله وخلاص

اني نشرب في الشاهي :حاضر به

-وبالفعل بعد ما كملت الفطور.. نضت خدي الكسبه.. وعطيتها للسعي.. ومشيت لي تليفوني.. لقيت التحميل كمل.. ورصيد النت كامل اووف.. خلي نمشي نشري.. لبست عبايتي و وشاحي.. وخدي خمسه وتلاتين دينار وطلعت..

اني :جداي بنمشي نشري كرت رصيدي كمل شوي وتو نجي .. بنمشي لمحل حسونه

جداي ترمي في الخبزة في الفرن :به باه غر ما تعطليش

اني :حاضر

-وطلعت مشيت للمحل حسونه

اني :لو سمحت عطيني كروت ليبيانا

حسونه :الشركه بزنست منك سادك سادك

اني :تو على اساس انت ما تفتحش في نت..

حسونه :ايواه اقلبي طاولة عليا توا مفلحك فيه

اني ضحكت :بااهي شني عمتك فوزيه ما جبتش مقريضات بالعسل الحوقاني اوو!

حسونه :لا ياحنه جابت بسيسه بس

اني :ايواه باهي مالا بسلامه توا..

-واني طالعه فجأة لقيت قدامي ملكوت!!.. نصدمتت..

ملكوت :اهلا اهلا بالعصماء

اني :اهلين!

ملكوت :شفتي الحكم لي جاك!

اني :شنوو!

ملكوت :….. يتبع

قيمس الملكوت رواية للكاتبة الليبية فاطمه سالم الورفلي

إقرأى أيضا: فوائد الزنجبيل .. وعلاجه لأمراض كثيرة ومعلومات هامة جدا